21.4.2007 | 21:16
La passeggiata
Hótelið okkar í Marotta í sumar stendur nánast á ströndinni eins og myndin með þessari færslu sýnir, en hún er tekin á veröndinni fyrir framan hótelið, þar sem upplagt er að fá sér kaffi eftir vambakýlingar inni í matsalnum. Milli hótels og strandar er aðeins mjó gata og þar er ekki nema mjög takmörkuð umferð vélknúinna ökutækja.
Á kvöldin er mikið af fólki á þessari þröngu strandgötu en á þeim tíma dagsins, þegar sól er svo lágt lotin að hún hættir að brenna á manni hörundið, upphefst vítt og breitt um Ítalíu siður sem nefnist la passeggiata. Hann felst í áhyggjulausu lötri um götur og stræti, ekki síst á göngusvæðum centro storico (sögulega miðbæjarins) borga og bæja.
Ítalir klæða sig gjarnan upp fyrir passeggiata og ferðamenn í stuttbuxum og ermalausum bolum skera sig vel úr hópi göngufólks. Eldri borgarar fá sér oft sæti inni á börum, dreypa á vínglösum og eru á útkíkki eftir efnilegum slúðurefnum. Oftar en ekki byrja ástarævintýrin nefnilega á la passeggiata og geta orðið þar jafn sýnileg og nýju skórnir.
Passeggiata nýtur sérstakra vinsælda á sunnudagskvöldum en þá aka margir til nálægra borga til að fá sér þar sína sérstöku kvöldgöngu.
Maður getur vel fundið fyrir þessum góða sið á veröndinni við Sólarhótelið (Hotel Sole). Þó að Marotta sé ekki nein stórborg er gaman að sitja þar í kvöldsvalanum og fylgjast með þeim sem um strandgötuna fara.
Athugasemdir
''Í sumar''. Er það nk sumar eða sl. sumar. Einnig er ég forvitin afhverju þú ert svo fróður um ítalska menningu. Eitthvað sem þú drakkst í þig í 2ja vikna sumarfríi á staðnum, lestur eða...? Sorry, er bara forvitin.
Jóna Á. Gísladóttir, 21.4.2007 kl. 23:48
Kæra Jóna. Við erum að fara í "safnaðarferð" til Ítalíu næsta sumar, 18 Akureyringar og við verðum á Sólarhótelinu á Mörkum. Það er hægt að lesa um þetta í fyrri færslum á blogginu mínu. Ég er enginn spesíalisti um ítalska menningu en hef farið þangað nokkrum sinnum. Síðast sumarið 2005. Þá gistum við á Sólarhótelinu. Ég fer helst aldrei neitt nema lesa mér til um áfangastaðina áður. Finnst það partur af ævintýrinu. Stundum er lesturinn meira að segja skemmtilegri en ferðin.
Ég hef sjaldan gist á jafn skemmtilegu hóteli og Hotel Sole í Marotta á Mörkum. Þetta er svona hæfilega lúið hótel, dálítið beygt af reynslunni, en með sál og engin Massentourismus eins og Þjóðverjinn segir. Það er rekið af Rapa-fjölskyldunni sem einnig rekur Hotel Casadei í næsta þorpi. Ef þú ert ítalófíl og ert á leiðinni þangað suður skal ég gefa þér adressuna.
Þú þarft ekkert að vera sorrý. Forvitni er í flestum tilfellum af hinu góða. Og hjartans þakkir fyrir áhugann.
Svavar Alfreð Jónsson, 22.4.2007 kl. 00:08
Takk fyrir þetta. Er víst ekki á leiðinni neitt (sagt í bitrum tóni) en væri samt afskaplega þakklát ef þú gæfir mér adressuna og nenntir að smella henni á jonag@icelandair.is. Einhvern tíma mun ég fara til Ítalíu og þá er ekki verra að fara á stað sem Ítalíu-mógúll mælir með
Jóna Á. Gísladóttir, 22.4.2007 kl. 00:50
Bæta við athugasemd [Innskráning]
Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.