Ellefti níundi

Ellefta september verður allsérkennilegur fótboltaleikur á Hedenleikvanginum í Gautaborg. Þar takast á lið kristinna og múhameðstrúarmanna. Kristna liðið er m. a. skipað leikum og lærðum úr sænsku kirkjunni, þeirri kaþólsku og réttrúnaðarkirkjunni.

Múhameðstrúarmenn tefla fram sókndjörfum og stæltum trúarleiðtogum og trúmönnum frá Gambíu, Bosníu og Sómalíu.

Einnig eru nokkrir Gyðingar í báðum liðum, til frekari styrkingar og til að minna á rætur beggja fylkinganna.

Kl. 18:30 verður flautað til leiks. Biskup Gautaborgar flytur ávarpsorð. Gunnar Westberg, forseti alþjóðlegra læknasamtaka gegn kjarnorkuvá, verður á vaktinni með kæligel og teygjubindi.

Að sögn aðstandenda leiksins vilja þeir vinna gegn fordómum og staðalímyndum af trúarbrögðum.

Biðjum fyrir því að ekki sjóði upp úr í leiknum.

 

Athugasemdir

[Greta Björg Úlfsdóttir, 11.9.2007 kl. 01:03]

Það er eins gott!

[krossgata, 11.9.2007 kl. 09:51]

Athyglisvert, meira að segja svolítið skemmtileg hugmynd að horfa á.  Annars finnst mér íþróttakappleikir ekki til þess fallnir að sameina einn né neinn eða koma á friði milli hópa nema síður sé.  En það er nú bara anti-sportistinn í mér að tala þá.  Kannski eru þeir betur fallnir til að vinna gegn fordómum og staðalímyndum.