13.5.2007 | 12:43
Ítalía fyrir börn
Í færslum mínum hér vegna Ítalíuferðar okkar í sumar hefur ekki komið fram að auðvitað eru börn í hópi ferðalanga, hvorki fleiri né færri en 8 stykki. Sólarhótelið okkar er ákjósanlegt fyrir þau yngstu. Örstutt er í aðgrunnan sjóinn og jafnvel má fylgjast með börnunum busla þar af verönd og herbergissvölum.
Margir sögulega merkilegir staðir eru í þægilegu ökufæri frá hótelinu en þaðan er líka stutt í skemmtun fyrir börn á öllum aldri. Innan við klukkutíma tekur að keyra til:
Parco Zoo Falconara - myndarlegur dýragarður.
Parco le Navi - sædýrasafn (akvaríum) í borginni Cattolica.
Aquafan - hinn æsilegi sundlaugargarður í Riccione.
Delfinario Rimini - frægur höfrungagarður í Rimini, eini staðurinn á Ítalíu þar sem boðið er upp á meðferð fyrir einhverf börn með aðstoð höfrunga (tekið fram af því að tveir einhverfukennarar eru með í för).
Italia in Miniatura - einskonar Legoland Ítalíu. Þar eru til dæmis Feneyjar í stærðinni 1:5.
Casa delle Farfalle & Co - glæsilegt fiðrildasafn og fleira skemmtilegt.
Parco Oltremare - nýr og flottur fræðslu- og skemmtigarður um sjávardýr og höf heimsins.
Atlantica Park - ótrúlegur sundlaugargarður.
Hálfan annan tíma tekur svo að aka í Mirabilandia, einn stærsta skemmtigarð á Ítalíu og hina rómuðu vatnaparadís Aquajoss.
Athugasemdir
Dingalingalingaling... hringja svona bjöllur í hausnum á mér þegar minnst er á einhverfu. Ég er forvitin um höfrungagarðinn. Og reyndar líka um kennarana sem þú ætlar að eyða með tíma á Ítalíu. Einhver leið fyrir mig að afla upplýsinga?
Jóna Á. Gísladóttir, 13.5.2007 kl. 16:07
Það eru hæg heimatökin, Jóna mín. Konan mín stjórnar deild fyrir einhverf börn í Síðuskóla á Akureyri og tvær samstarfskonur hennar þar verða með í för. Ég er viss um að þær hafa hug á að kynna sér höfrungagarðinn enda er þetta mjög forvitnilegt. Ef til vill ættir þú bara að skella þér með? Póstfang minnar kæru er dis@akmennt.is
Svavar Alfreð Jónsson, 13.5.2007 kl. 18:21
Nú er maður orðinn forvitinn varðandi þetta ferðalag. Er þetta hópferð sem þið eruð að fara í, í einhverjum ákveðnum tilgangi, eða bara skemmtiferð? Þetta hljómar allt saman svo spennandi, enda Ítalía afar spennandi áfangastaður :)
Þorgerður (IP-tala skráð) 14.5.2007 kl. 01:03
Sæl Þorgerður! Þetta er 18 manna hópferð. Ég hef líka kallað þetta safnaðarferð. Upphaflega var ætlunin að vera í rútu úti en vegna kostnaðar og samsetningar hópsins var ákveðið að taka bílaleigubíla. Þá getur hver haft það lag á ferðinni sem hann vill. Urmull af sögu- og trúarlega merkilegum stöðum er í námunda við hótelið okkar og hér á blogginu hef ég verið með örlitla fræðslu um þá. Hópurinn fer allur í dagsferð til Assisi og þar verður boðið upp á leiðsögn heimamanns. Einnig fræddi bróðir Davíð Tencer, munkur á Kollaleiru, okkur um heilagan Frans eina kvöldstund í Safnaðarheimili Akureyrarkirkju nýlega. Menn eru þegar byrjaðir að ræða um næstu safnaðarferð og þér kann að þykja það áhugavert að stefnan er sett á Coventry á Englandi. Akureyrarkirkja hefur mjög ákveðin tengsl við dómkirkjuna þar í borg og þar er unnið einstakt sáttastarf á heimsvísu.
Svavar Alfreð Jónsson, 14.5.2007 kl. 08:33
Coventry er alls ekki langt frá Nottingham, þar sem ég er, og upphaflega ætlaði ég að fara þangað :) En þetta hljómar rosalega spennandi og verður örugglega ógleymanleg þessi Ítalíuferð. Spennandi að vita hvort Coventry verður næsti áfangastaður :)
Þorgerður (IP-tala skráð) 15.5.2007 kl. 01:23
Bæta við athugasemd [Innskráning]
Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.