Þegar ég gerðist klæðskiptingur

Um árabil hafa verið mömmumorgnar í Safnaðarheimili Akureyrarkirkju, á miðvikudagsmorgnum yfir vetrartímann. Þeir eru merkilegt grasrótarstarf, skipulagðir og framkvæmdir af mömmum.

Ég var að róta í gömlum myndum og rakst þar á þessa. Á henni gefur að líta mig ásamt Höllu Gunnarsdóttur, snyrtifræðingi. Myndin gæti verið tíu ára gömul.

Mömmurnar spurðu mig hvort Halla mætti farða mig og breyta mér í konu. Ég hélt það nú.

Ég gerði mér víst ekki alveg grein fyrir hversu gagngerar og róttækar breytingar Halla vinkona mín ætlaði að gera á mér enda er ég glaðhlakkalegur á myndinni.

Ekki var nóg með að Halla málaði mig. Sett var á mig hárkolla og ég klæddur í kjól og skó með háum hælum.

Að sögn viðstaddra var ég einstaklega sjarmerandi og sexí kona.

Þegar umbreytingunni var lokið birtust óvænt hjónaleysi í viðtal. Ég var búinn að taka að mér að koma þeim í eina sæng.

Þau ráku upp stór augu þegar þau sáu prestinn sem átti að gifta þau.

Athugasemdir

[Ragnheiður (IP-tala skráð) 20.1.2008 kl. 18:26]

Væri nú ekki skemmtilegra að láta mynd af afrakstrinum fylgja færslunni, svona rétt til að gleðja augað:)

[Sigurður Karl Lúðvíksson, 20.1.2008 kl. 18:26]

Fimmta Mósebók 22:5

"Eigi skal kona ganga í karlmannsbúningi og eigi skal karlmaður fara í kvenmannsföt, því að hver sá, er slíkt gjörir, er Drottni Guði þínum andstyggilegur." 

Guðlastari!

[Svavar Alfreð Jónsson, 20.1.2008 kl. 19:42]

Því miður á ég ekki mynd af mér í kvenmannslíki. Þó voru teknar myndir af mér í því ástandi...

Og Sigurður Karl: Ef til vill hef ég mér til málsbóta að ég fór ekki í kvenmannsföt heldur var færður í þau?

[Sigurður Karl Lúðvíksson, 20.1.2008 kl. 21:24]

Ok, þá sleppur þú við vítislogann á tæknilegum forsendum, heppinn ertu.

[Hólmgeir Karlsson, 20.1.2008 kl. 21:45]

Sammála að gaman hefði verið að sjá mynd af "konunni" ... en hvernig fór þetta með parið, gastu pússað þau saman? :)

[Hólmgeir Karlsson, 20.1.2008 kl. 21:49]

"kvenmanslíki" .. æ svona varðandi þessa athugasemd Guðlastarans ... þá er þetta nú ekki alvarlegri glæpur fyrir mér en að smjör bregði sér í smjörlíki :)

[Sigurður Karl Lúðvíksson, 21.1.2008 kl. 00:57]

Nei, sjáðu til kæra Anna, það er ekki synd í mínu lífi að klæðast kvenmannsfötum. Ég geri lítið af því sjálfur en hef einstaklega gaman af þeim sem hafa karakter til að gera svo, þeir lita lífið. Þannig er syndin eitthvað sem ég þarf ekkert að svara fyrir né saka aðra um og sem fyrr er það hlutverk kristinnar manna að grýta mann og annan, ekki trúleysingja.

[Svavar Alfreð Jónsson, 21.1.2008 kl. 07:27]

Sigurður Karl! Meira að segja færsla eins og þessi verður þér, trúleysingjanum, tilefni til leiðindanöldurs og hver er að kasta grjótinu hérna?

[Sigurður Karl Lúðvíksson, 21.1.2008 kl. 13:54]

Ég er ekki að kasta grjóti, ég er að nöldra í þér .  Ég á mér enga viðreisnarvon hvort sem er, ég mun brenna í vítisloganum samkvæmt kristnum og verður aldrei fyrirgefið þar sem ég hef framið einu höfuðsyndina sem ekki hægt er að fá fyrirgefningu á, og það er að afneita heilögum anda eins og kemur fram í Mattheusarguðspjalli:

"Þess vegna segi ég yður: Hver synd og guðlöstun verður mönnum fyrirgefin, en guðlast gegn andanum verður ekki fyrirgefið. 32Hverjum sem mælir gegn Mannssyninum, verður það fyrirgefið, en þeim sem mælir gegn heilögum anda, verður ekki fyrirgefið, hvorki í þessum heimi né í hinum komanda."

Þá er eins gott og láta bara gamminn geysa, engu að tapa, ég mun brenna hvort sem er  .

[Snorri Magnússon, 21.1.2008 kl. 14:45]

Það er undarleg árátta, trúleysingjanna, að benda stöðugt á flísarnar í augum trúaðra og finna stöðugt, máli sínu til stuðnings, ritningagreinar í Biblíunni, ritinu sem þeir sjálfir segjast hafa afskrifað.

Hverjir eru eiginlega þessir, sjálfskipuðu siðapostular?

[Sigurður Karl Lúðvíksson, 21.1.2008 kl. 16:21]

Við höfum ekkert afskrifað biblíuna, við höfum aðeins neitað sannleiksgildi hennar og sérstaklega afneitað henni sem siðferðisrit, enda stútfull af mjög vafasömum boðskap dauða og tortímingar saklausra. Prestar eru sjálfskipaðir siðapostular, það er augljóst. Mér finnst þetta ekkert undarleg árátta, þetta er bara nánast óhjákvæmilegt, ég get bara ekkert að þessu gert, þið bjóðið þessu heim  .

Það er enginn guð til.

[Snorri Magnússon, 23.1.2008 kl. 23:42]

Það var nefnilega það.

Þá er gaman að henda fram gamalli spurningu Friedrich Schelling:

"Af hverju er yfirleitt eitthvað? Af hverju ekki ekkert?" (e: "Why is there anything at all?  Why not nothing?").