Hugrekki Fréttablaðsins

Fyrir rúmu ári efndi Fréttablaðið til vals á besta auðmanni Íslands. Valið stóð á milli ellefu nafngreindra auðmanna og var í því skyni leitað til nokkurra útvalinna álitsgjafa. Átti hver þeirra að nefna þrjá uppáhaldsauðmenn sína.

Fréttablaðið mæltist til þess að álitsgjafar hefðu þrennt til hliðsjónar við valið.

Í fyrsta lagi stíl og ásjónu auðmannanna, klæðaburð og sjónvarpsútlit.

Í öðru lagi hegðun þeirra og framkomu, orðheppni og góðverk.

Í þriðja lagi bað Fréttablaðið álitsgjafa að meta munað og lúxus auðmannanna eða eins og það er orðað í leiðbeiningum blaðsins:

Hver á flottustu bílana og kann best að nýta sér lífsins lystisemdir? Hver á flottustu flugvélarnar og húsin? Hver lifir öfundverðasta munaðarlífinu?

Nú, rúmu ári eftir að Fréttablaðið efndi til valsins á besta auðmanninum, birtir það harðorðan leiðara um ástandið. 

Loksins!

Þar er m. a. talað um hyski og hef ég ekki séð svo sterkt að orði kveðið um eina þjóðfélagsstétt í ritstjórnargrein stærsta dagblaðs landsins.

Við prestarnir erum víst þetta hyski sem Fréttablaðið er búið að finna.

Hugrekki Fréttablaðsins er aðdáunarvert.

Þó veit ég ekki hvort er neyðarlegra, að vera mesta hyski Fréttablaðsins eða þess besti auðmaður.

Athugasemdir

[Einar Áskelsson (IP-tala skráð) 28.12.2008 kl. 21:47]

Eftir lesturinn um "hyskið" datt mér ekki annað í hug en Páll Baldvin væri með háðlega fyndni og færði í stílinn.  Vonandi miðað við orðaflauminn.  Það þarf enginn að segja þér Svavar að þið prestarnir eruð ekkert hyski.  Gott hjá þér að benda á kúvendinguna á skoðun Fréttablaðsins á auðmönnunum.  En þeir eiga enn líf sitt undir þeim...eða því hyski.  Kannski vill Páll Baldvin einfaldlega skrifa sig út af sakramentinu..hjá þeim.  Annars gleðilega hátíð Svavar.

[Ragnar Eiríksson, 28.12.2008 kl. 21:55]

Hyski er nú ekki svo slæmt orð, það eru mörg verri sem nota mætti!   Það var að vísu talað um Grýlu og hyski hennar sem var náttúrlega allt heldur vont, bóndinn, börnin og kötturinn!     Það var líka talað um "bóndann og hyski hans" og þá átt við allt heimilisfólkið, konu, börn, niðursetninga o.s.frv. en ekki endilega í vondri meiningu en ég held reyndar að fátækt hafi oftast verið fylgifiskur þess að vera kallaður hyski!     Það síðasta á víst ekki við um kirkjuna og þjóna hennar frekar en ríkisstjórnina og hyski hennar!!!

[Heimir Lárusson Fjeldsted, 28.12.2008 kl. 21:57]

Fólk með heilbrigða skynsemi tekur ekki mark á Fréttablaðinu í dag frekar en fyrri daginn.

Þakka þér fyrir að minna mig hversvegna ég er hættur að lesa lágkúruna í þessum auma Baugsmiðli.

[Ragnar Eiríksson, 28.12.2008 kl. 22:02]

PS.  Hver vann í kosningunni um auðmanninn - svona mér til fróðleiks því ég hef ekki séð Fréttabl. nema stöku sinnum.   Mér fannst reyndar leiðari Páls ágætur þó frekar megi skamma aðra en ykkur prestana.   "Eftirá að hyggja" er skoðanakönnunin um auðmennina afar lágkúruleg og sýnir hvert við (þjóðin) var komin.

[Anna Benkovic Mikaelsdóttir, 28.12.2008 kl. 22:30]

Prestar og auðmenn lifa jú bara á þjóð sinni og arðræna hana!

[Hólmgeir Karlsson, 28.12.2008 kl. 23:02]

Ef prestar landsins væru jafn áttavilltir og tækifærissinnaðir og Páll Baldvin á Fréttablaðinu og allt hanns "hyski" þá myndu nú flestir flýja Þjóðkirkjuna í snatri. Svo hafðu ekki áhyggjur Svavar :)

[Theódór Norðkvist, 28.12.2008 kl. 23:11]

Prestar landsins hafa einstakt tækifæri í kreppunni til að sanna að þeim sé alvara með prédikunum sínum um nægjusemi að hætti Jesú Krists.

Þeir geta afsalað helming launa sinna til fátækra, t.d. Fjölskylduhjálparinnar. Eða ætla þeir að halda áfram að fara fram á að prédikanir þeirra gegn óhóflegum lífsstíl eigi við alla nema þá sjálfa?

Nú er ég ekki einu sinni að biðja um að prestar fari eftir orðum þess kennara sem þeir segjast vera umboðsmenn fyrir. Jesús gekk mun lengra í sínum kröfum:

Ef þú vilt vera fullkominn skaltu fara, selja eigur þínar og gefa fátækum og þú munt fjársjóð eiga á himnum. Kom síðan og fylg mér. (Matteusarguðspjall 19:21)

Það ætti öllum að vera augljóst að þeir prestar sem eru á ofurlaunum hjá ríkinu eru ekki að fylgja þeim Meistara sem þeir kenna sig við.

[Svavar Alfreð Jónsson, 28.12.2008 kl. 23:29]

Ragnar: Einhverjar niðurstöður má held ég sjá á þessu ágæta bloggi. Um tildrög valsins hér.

[Kolbrún Stefánsdóttir, 28.12.2008 kl. 23:42]

Sæll Svavar og gleðilega rest eins og sagt var fyrir norðan hér áður fyrr. Mér finnst þetta bara skemmtilegur pistill hjá Páli þó ég sé öllu jafna ekki fyrir svona málskrúð. Þetta er svona nett yfirferð um ástandið í dag sem allir þekkja. Það er von að þið séuð nefndir prestarnir nú á jólum. Þetta er ykkar tími, ykkar vertíð. Fyrrverandi mágkona mín talaði alltaf um fjölskylduna sína sem sitt hyski þ.e. þeir sem tilheyrðu hennar húsi. Fáa þekki ég sem unna sínum börnum og bónda meira en hún gerði og ekki voru þau fátæk. Ég á nú ekki von á að þið farið að gefa einkafyrirtæki í hjálparstarfi helminginn af laununum ykkar  og vonandi farið þið ekki að taka upp trúboð að hætti Krists og ganga í hús og um héruð til að breiða út boðskapinn, sníkjandi fæði og gistinu hér og þar. Ég óska þér árs og friðar  kveðja Kolla.

[Nykur (IP-tala skráð) 29.12.2008 kl. 00:21]

Auðvitað eru prestar landsins mestpart hyski.Það er nú eins og þetta séu eitthvað gjaldeyrisskapandi störf.Störf þeirra  liggja mest part niður í jörðina og þar grafa þeir mistök skólasystkina sinna sem fóru í læknisfræði og þar á milli reyna þeir að ljúga að þjóðinni 2000 ára draugasögum úr miðausturlöndum og á launum hjá ríkinu

[Heimir Lárusson Fjeldsted, 29.12.2008 kl. 09:39]

Mikið á Nykur bágt.

[Baldur Gautur Baldursson, 29.12.2008 kl. 11:38]

Það versta við allt er að fjölmiðlar hafa gersamlega skitið á sig í allri umfjöllun um ástandið í landinu.  Þeir eru ekki fremur trúverðugir en stjórnendur landsins.

[Adda Steina (IP-tala skráð) 29.12.2008 kl. 12:23]

Frábær pistill.

[Matthías Ásgeirsson, 29.12.2008 kl. 13:38]

Hefur þú velt því fyrir þér hvort þessi leiðari Fréttablaðsins tengist eitthvað jólaleiðara Morgunblaðsins.

Ekki sástu tilefni til að skrifa orð um þann leiðara og var hann þó eflaust stærra "fokk jú" merki til þeirra sem ekki aðhyllast kristna trú hér á landi.  Kjarni hans var einmitt sá að kristin trú segði okkur að halda kjafti og vera sæt í stað þess að eltast við sökudólga.

Hyski biskups inniheldur fleiri en bara presta.

[Þráinn Kristinsson (IP-tala skráð) 29.12.2008 kl. 15:29]

Fyrirgefum honum og réttum hina kinnina og bræðum steinhjartað hans sjúka.

[Benedikt Sigurðarson, 29.12.2008 kl. 19:43]

Góður prestur minn.  Látum okkur máli skipta hvernig samfélagið þróast og hverju fer fram.

Þú ættir að opna á predikanir þínar fyrir þeim sem ekki koma í kirkjuna! Bara uppástunga!

[Svavar Alfreð Jónsson, 29.12.2008 kl. 21:10]

Þakka þér, Bensi, minn gamli kennari. Við eigum svo sannarlega að skipta okkur af  því hvernig samfélagið þróast.

Það hittist reyndar þannig á að sirka helmingurinn af þessari færslu er þráðbeint úr prédikun eftir mig.