Svavar Alfreð Jónsson

29.12.2008 | 22:49

Hagfræði góðærisins

Hagfræðingar frjálshyggjunnar hafa boðað okkur að markaðurinn sé eins og veðrið; það stjórnist af sínum sérstöku reglum. Að þeirra mati lýtur efnahagslífið eigin lögmálum á sama hátt og vindar og regn.

Það eina sem við getum gert er að spá í fyrirbærin.

Eina raunverulega hagfræðin er einhvers konar efnahagsleg veðurfræði.

Hinir sönnu hagfræðingar eru sjáendur.

Spádeildir bankanna eru eins og Veðurstofa Íslands.

Við trúðum þessu og gleyptum meira að segja þær kenningar þessara hagspekinga að fái markaðurinn að þróast að vild sinni endi það í unaðslegum sólarhita á öllum veðurstöðvum.

Sem er alveg þokkalega þægileg trú þangað til frostaveturinn kemur eða ísöld rennur upp og landsins forni fjandi birtist.

Sá er samt munurinn á efnahagslífinu og veðrinu að við mennirnir höfum litla stjórn á því síðarnefnda en getum haft töluvert um það að segja hvernig það fyrrnefnda þróast.

Tennur hinnar heimslægu villutrúar á sjálfstýringu markaðslögmálanna bitu að þessu sinni fyrst og dýpst í okkur Íslendinga.

Þær nöguðu af okkur bankana, fasteignirnar og spariféð. Aleiguna og atvinnuna. Og orðsporið.

Efnahagslífinu verður að stýra. Um það verða að gilda skýrar reglur. Það er ekki bara tæknilegt úrlausnarefni. Það hefur markmið. Það hefur siðræna vídd - og hún er reyndar sú mikilvægasta.

Efnahagslífið er ekki bara verkefni hagfræðinga eða sérfræðinga í fílabeinsturnum.

Það hvernig takmörkuð heimsins gæði útdeilast er á ábyrgð okkar allra.

Fatti þjóðin það leyfi ég mér að spá spennandi góðæri framundan.

Þannig er mín hagfræði.

Flokkur: Bloggar | Facebook

Athugasemdir

Þetta voru hagfræðingar... en frjálshyggjumenn voru þeir ekki.

Sannir frjálshyggjumenn hafa alltaf varið við þessum bólum, við verðbólgu og afleiðingum þess að ríkið sé með puttana í öllu.

Ríkið er búið að grípa inn í hagkerfið með stórfeldum fjárfestingum, skattalækkunum og afskiptaleysi af þenslu og lánaþenslu. (Afskiptaleysi af því rugli sem var í gangi, er tegund afskipta)

Þessir hagfræðingar eru ekki fjálshyggjumenn en þeir trúa því að það megi misbjóða markaðnum endalaust, hann leiðrétti sig alltaf að lokum.

Frjálshyggjumenn hafa bent á að afskipti af markaðinum á þennan veg endi alltaf illa, þar er munur á.

Lúðvík Júlíusson, 30.12.2008 kl. 10:52

Góður pistill og hárréttur.

Ég skal fara lengra með þetta. Mannkynið er einfaldlega ekki komið nógu langt í sinni vitundarþróunn til að jöfnuður ríki.

Það eru ákveðnar breytingar þó til batnaðar núna. Enda er ekki hægt að gera það sem menn vilja endalaust á lítilli kúlu eins og Jörðinni. Hún einfaldlega ber ekki endalaust að græðgi vaxi.

Annars er óþarfi að flækja þetta. Nýfrálshyggja heitir græðgisstefnann sem varð Íslandi að falli.

Geir H. Horde og Davíð Oddsson eru stærstu hönnuðir hennar hér á landi.

Már (IP-tala skráð) 30.12.2008 kl. 18:34

Sælar og áfram stelpur

Í dag er mjög mikilvægur dagur, í dag erum við að mótmæla ójafnrétti gagnvart konum á vinnumarkaði, ójöfnum launum og ójöfnum vinnuskilýrðum. Íslenskar og erlendar konur búum ennþá við ójafnrétti og hafa staðið í baráttu gegn því í meira enn heila öld.

Samtök kvenna af erlendum uppruna á Íslandi fagna tveggja ára afmæli í dag, og það var ekki fyrir tilviljun að þær stofnuðu samtökin sama dag og barátta íslenskra kvenna átti sína stund árið 1975, við erum hluti af baráttu íslenskra kvenna og við reynum að berjast gegn missrétti sem útlenskar konur lenda í. Konur af erlendum uppruna lifa við tvöfald missrétti, vegna bæði þjóðernis og kyns.

Stærsta hindrun fyrir konur af erlendum uppruna, er að íslenskukunnáttu vantar ,og er þetta hindrun sem ekki er auðvelt að komast yfir. Þær hafa ekki allar efni á dyrum námskeiðum sem fram fara á kvöldin eftir 10 tíma vinnudag, þar sem reynt er, að gera málfræðinga úr þeim ,á meðan við getum enn ekki fyllt út umsókn fyrir húsaleigubætur. Eins og ástandið er núna ,eiga flestar mjög erfitt með að þekkja skyldur sínar og réttindi á vinnumarkaði, það er oft erfitt að fá upplýsingar um starfsréttindi þeirra. Fyrir nokkru var skorið niður hjá heilbrigðisstofnunum hér í Reykjavík og dæmi eru um, að erlendar konur sem unnu í ræstingum þurftu einfaldlega að vinna tvöfalda vinnu fyrir sama kaup og áður.

Varðandi atvinnu- og dvalarleyfi eru okkar konur sem koma ekki frá Vestur Evrópa eru gjörsamlega háðar atvinnurekanda sínum í fjögur ár, það þýðir að þær geta ekki skiptum vinnu án samþykkis vinnuveitendans. þær verða þannig að sætta sig við þau kjör sem þeim voru boðin áður en þær koma hingað. Enn Þá vissu þær ekkert um líf og kjör hérna. Annars eiga þær á hættu að vera vísað úr landi samkvæmt atvinnulögum.

Okkar konur fá ekki bara minni laun en karlmenn . með sömu menntun og í sama starfi. Oft fá þær menntun sína ekki viðurkennda. Erlendum ljósmæðrum eða hjúkrunarfræðingum dæmi sé tekið er velkomið að vinna sömu vinnu og íslenskar starfssystur þeirra en fyrir það fá þær borgað sem sjúkraliðar.

Vandamálin fyrir erlendar konur á íslenskum vinnumarkaði eru mörg og við skulum ekki þegja yfir því. en við erum líka orðin leið á því að orðin erlendar konur og vandamál eru oft notuð í sömu setningu. Við erum líka hér í dag til að fagna með ykkur og að sýna að við lítum ekki á okkur sem fórnarlömb, erlendar konur sem hafa komið hingað hafa flestar komist yfir háar hindranir, þær eru sterkar og þær hafa eitthvað fram að færa og ég stend hérna fyrir framan ykkur til að segja frá því.

Ég er þakklátur fyrir að fá vera með ykkur í dag og geta þakkað fyrir stuðninginn sem kvennahreyfingin á Íslandi sýnir okkur og vil hvetja konur af öllum stærðum og gerðum, af öllum menntunarstigum og bakgrunni , af öllum litum og trúarbrögðum, að vinna saman til að ná markmiðum okkar.

Við viljum frían aðgang að íslenskukennsluá
Við viljum bætta atvinnulöggjöf
Við viljum fá menntun okkar metna.
Og við viljum samfélag sem sér það sem við höfum fram að færa, ekki bara það sem á vantar.

Þær eru orðnar hluti af þessu samfélagi og af þessari kvennahreyfingu og við stöndum saman í baráttunni.

Við hættum ekki fyrr enn réttindi þeirra eru komin til að vera.

Áfram Stelpur