Syngman Rhee lætur enn ófriðlega

 

Ég sakna gömlu flokksblaðanna.

Mogga og Vísis íhaldsins, Tíma kaupfélagsmannanna, Alþýðublaðs kratanna og Þjóvilja kommanna. 

Blöð sem komu inn um lúgurnar eins og þau voru klædd. 

Nú eru þetta bara auðmenn að rífast.

Við sjáum það kannski ekki, Íslendingar, en aðrir eru fyrir löngu búnir að sjá það, sbr. þessa frétt og þessa.

Bjöggarnir voru þar að auki búnir að kaupa sig langleiðina inn í RÚV.

Var það ekki séra Bjarni sem sagði á sínum tíma að á Akureyri vantaði bara KEA-merkið á kirkjuna?

Á Íslandi var túrbókapítalisminn búinn að eignast allt.

Nema kannski kirkjuna. Og VG.

Menn geta svo dundað sér við að finna út hvort þau fyrirbæri hafi átt eitthvað sameiginlegt.

Annað:

Maður þarf ekkert að hafa mikinn húmor til að geta brosað að ýmsu varðandi ESB.

Ég hló til að mynda pínulítið þegar ég las í morgun að meirihluti kjósenda VG væri á móti stefnu VG.

En auðvitað er það sjónarmið að segja að sækja þurfi um aðild að ESB til að hægt sé að meta hvort ganga eigi í ESB.

Samkvæmt því er í raun ekkert hægt að segja til um hugsanlega aðild Íslands að ESB nema þegar aðildarsamningurinn liggur fyrir.

Engu að síður hafa báðir stjórnarflokkarnir býsna afdráttarlausa stefnu varðandi ESB.

Annar vill inn. Hinn ekki.

Þegar þeir halda því svo fram að ekki sé hægt að meta aðild nema þegar búið er að sækja um aðild finnst mér þeir gera lítið úr stefnunni sem þeir höfðu. Og vel má brosa að því.

Ég er líka viss um að sumir af stækustu andstæðingum ESB fagna mjög umsókn Íslands um aðild að ESB.

Þeir vita sem er að sjaldan eða aldrei hefur samningsaðstaða Íslands verið verri en núna.

Sennilega hafa aldrei verið meiri líkur á að íslenska samninganefndin komi heim með skítasamning, eða "rotten deal" eins og Össur orðar það.

Þá verða allir voða reiðir.

Og ekki eykur það líkur ríkisstjórnarinnar á að ná góðum díl við ESB að um það bil helmingurinn af ríkisstjórninni sem sótt hefur um aðild að ESB vill alls ekki ganga í ESB.

Það finnst mér eiginlega fyndnast.

Myndin: Blessuð sé minning Þjóðviljans sem gaf mér fyrirsögnina að þessu bloggi.

Athugasemdir

[Sigurður Þórðarson, 30.7.2009 kl. 15:04]

Mjög mikið til í þessu. Menn komu til dyranna eins og þeir voru klæddir.

Ég skal viðurkenna að fyrirsögnin var mér ráðgáta

[Haraldur Hansson, 30.7.2009 kl. 15:52]

Þegar flokkurinn breytir um stefnu þá breytir hann líka um stuðningsmenn.

Ég var í hópi þeirra sem kaus VG vegna andstöðunnar við ESB. Ég myndi ekki kjósa þá í dag. Tæp 57% stuðningsmanna VG segjast fylgjandi aðildarviðræðum.

Þeir sem nú gefa sig upp í símakönnun sem stuðningsmenn VG eru varla sami hópurinn og kaus flokkinn í apríl. Þá bauð fram undir þeirri stefnu að vera andvígur aðild að Evrópusambandinu. Nú stendur hann fyrir umsókn.

Fylgi VG hefur dvínað, sem samsvarar því að 13,4% kjósenda flokksins hafi yfirgefið hann. Þeir eru þó líklega fleiri, en nýir komið í staðinn, einmitt vegna Evrópumála. Er það gott eða slæmt fyrir flokkinn? 

[Katrín, 31.7.2009 kl. 00:29]

hef einmitt verið að hugsa það sama...þegar þessi blöð komu út vissi maður nákvæmlega fyrir hvað þau stóðu....en í dag er á engan fjölmiðil að treysta