Fyrir jólatónlistarfíkla

 

Nýlega voru Frostrósatónleikar hér í Íþróttahöllinni. Fer tvennum sögum af þeim. Hljómburðurinn í höllinni er vitaskuld umdeildur og eins þykir mörgum sem ég hef heyrt í of mikil peningalykt af fyrirtækinu þótt margir frábærir listamenn hafi komið fram á tónleikunum.

Frostrósir eru pínulítið 2007. Jólin í útrásarham.

Manninum sem gekk út af tónleikunum og kom til mín í kaffi og kjúkling af því ég á heima rétt hjá íþróttahöllini benti ég á Akureyrarkirkju og það frábæra og fjölbreytta tónlistarstarf sem þar fer fram.

Annað kvöld er nýstofnaður kammerkór, Ísold, með sína fyrstu tónleika í kirkjunni. Þeir hefjast kl. 20. Ég hlakka mikið til að heyra í þessum nýja kór. Hann skipa ungar konur sem eru vaxnar upp úr Stúlknakór Akureyrarkirkju.

Ég þekki eina 18 ára Ísoldarstúlku sem byrjaði að taka þátt í kórastarfinu 7 ára gömul og er búin að syngja sig upp í gegnum kórana í kirkjunni. Mér er sagt að hún hafi misst af einni kóræfingu á öllum þeim ferli.

Næsta sunnudag er síðan komið að árlegum Jólasöngvum Kórs Akureyrarkirkju. Þeir eru fyrir löngu orðnir ómissandi þáttur í jólaundirbúningi stórs hluta bæjarbúa. Undanfarin ár hefur þurft að hafa þá tvisvar, kl. 17 og 20, og hefur kirkjan fyllst í bæði skiptin.

Kórinn hefur sjaldan verið betri en núna.

Styrktartónleikar líknarsjóðsins Ljósberans verða í Akureyrarkirkju 17. desember kl. 20. Björg Þórhallsdóttir, söngkona, hefur veg og vanda af undirbúningi þeirra og syngur þar ásamt góðum gestum.

Kammerkórinn Hymnodia verður með sína jólatónleika mánudaginn 21. desember. Söngur kórsins er sannkallað eyrnakonfekt og hann er án efa í fremstu röð slíkra kóra hér á landi.

Ofangreint sýnir þróttinn í tónlistarstarfinu í Akureyrarkirkju en þar standa í brúnni organistarnir Eyþór Ingi Jónsson og Sigrún Magna Þórsteinsdóttir.

Auk nefndra kóra starfa tveir barnakórar við kirkjuna.

Jólatónlistarfíklar geta flutt inn í kirkjuna næstu vikurnar með svefnpoka og tannbursta.

Myndina tók ég í Brynjuísbíltúr í gærkvöldi og þar gefur m. a. að líta Akureyrarkirkju. Akureyskara verður það varla.

Athugasemdir

[Kolbrún Stefánsdóttir, 8.12.2009 kl. 22:44]

 Jólalegt og fallegt. Akureyri eins og stórborg á þessari mynd. Ég hef gaman af góðri tónlist en dytti aldrei í hug að fara á rándýra dívutónleika. Hvorki Frostrósir né Kidda Konn. Alls ekki Bubba og ekki einu sinni Bjögga þó ég sé aðdáandi hans. Tónlist í kirkjum landsins er í hæsta gæðaflokki og stundum finnst mér hún stela athyglinni  frá hinu heilaga orði ef svo má segja . Kveðja Kolla